విజయవాడ నగరంలో హీరో చియాన్ విక్రమ్ సందడి చేశాడు. తంగలాన్ చిత్రం ప్రమోషన్ లో భాగంగా నగరంలోని బాబాయ్ హోటల్లో బ్రేక్ ఫాస్ట్ చేసిన చిత్ర యూనిట్.. ప్రెస్ మీట్ ఏర్పాటు చేసింది. ఈ సందర్భంగా చియాన్ విక్రమ్ మాట్లాడుతూ.. ఆగస్టు 15 తంగలాన్ చిత్రం వరల్డ్ వైడ్ గా రిలీజ్ కానుంది. ఐదు భాషలలో ఈ చిత్రాన్ని విడుదల చేస్తున్నాం. విజయవాడ వాతావరణం నాకు నచ్చింది. ఎప్పుడూ డైట్లో ఉండే నేను. ఈ రోజు దాన్ని బ్రేక్ చేశా, ఇడ్లీలు నోట్లో పెట్టుకోగానే కరిగిపోయేంత సాఫ్ట్గా ఉన్నాయి. కానీ, సాంబారు లేకపోవడమే కాస్త అసంతృప్తి. నేను విభిన్న పాత్రలు పోషించిన సినిమాలన్నింటినీ మీరు ఆదరించారు. ఇందులోనూ కొత్తగా కనిపిస్తా. దర్శకుడు పా రంజిత్ ఈ చిత్రాన్ని ఎంతో కష్టపడి తీశారు.
చిత్రంలోని ప్రతి సన్నివేశం ప్రేక్షకులను ఆకట్టుకుంటుంది. శివ పుత్రుడు, అపరిచితుడు, ఐ, నాన్న చిత్రాలను తెలుగు ప్రేక్షకులు ఎంతగానో ఆదరించారు. తంగలాన్ చిత్రాన్ని కూడా తెలుగు ప్రేక్షకులు ఆదరించాలని కోరుతున్నాను. తంగలాన్ ఒక ఎమోషనల్ మూవీ. కుటుంబ సమేతంగా ఈ చిత్రాన్ని చూడవచ్చు. హీరోయిన్ మాళవిక ఒక కొత్త లుక్ లో కనిపిస్తారు. లండన్ నుంచి వచ్చిన డేనియల్ ఈ చిత్రంలో ఒక పవర్ఫుల్ విలన్ పాత్రలో అద్భుతంగా కనిపిస్తారు. ప్రతి సన్నివేశాన్ని సింగిల్ షాట్ లో చేసాం. సంగీత దర్శకుడు G.V. ప్రకాష్ ఈ చిత్రానికి ప్రాణం పోశారు. పాటలకు ప్రేక్షకుల నుంచి విశేష ఆదరణ లభిస్తుంది. తంగలాన్ చిత్రంలో నా క్యారెక్టర్, హెయిర్, డ్రెస్సింగ్ విలక్షణంగా ఉంటుందని తెలిపారు.
